Қазақстан Республикасының Мемлекет басшысы Қасым-Жомарт Тоқаев ХIV Қысқы Паралимпиада ойындарында жоғары спорттық нәтижелер көрсеткен отандасымыз Ербол Хамитовты III дәрежелі «Барыс» орденімен марапаттады.

Айта кетейік, ХIV Қысқы Паралимпиада ойындары Италияда өтіп, әлемнің үздік спортшыларын бір арнаға тоғыстырды. Дүбірлі додада Ербол Хамитов ел намысын абыроймен қорғап, жоғары деңгейдегі шеберлігі мен табандылығын көрсете білді.

Мемлекет басшысы тарапынан берілген бұл марапат – спортшының қажырлы еңбегі мен табандылығының айқын дәлелі. Сонымен қатар, бұл – еліміздегі паралимпиадалық спорттың дамуына берілген жоғары баға.

Туризм және спорт министрлігіне қарасты Дене мүмкіндіктері шектеулі тұлғаларға арналған спорттық даярлау орталығының жаттықтырушылары Василий Коломиец пен Антон Ждановичке «Парасат» ордені, Солтүстік Қазақстан облысындағы «Үміт» мүмкіндіктері шектеулі тұлғаларға арналған спорт клубының жаттықтырушысы Аслан Тоқбаевқа «Құрмет» ордені табысталды.

Ербол Хамитовтың жетістігі – тек жеке жеңіс емес, тұтас Қазақстан халқының мерейін үстем еткен тарихи жетістік. Оның бұл табысы жас спортшыларға үлгі болып, ел спортының дамуына жаңа серпін беретіні сөзсіз.