Мемлекет басшысы Қасым-Жомарт Тоқаев Республика күніне арналған салтанатты жиында сөз сөйлеп, ұлттық мерекенің тарихи маңызына тоқталды.
Президент барша қазақстандықтарды ұлық мерекемен құттықтап, Республика күні ел тарихындағы айрықша мәні бар күн екенін атап өтті. 25 қазанда Қазақстанның Егемендігі туралы декларация қабылданып, ұлт тарихының жаңа кезеңі басталғанын айтты. «Бұл күнді Ұлы даладағы мемлекеттілік дәстүрі қайта жаңғырған күн деп айтсақ, артық емес», – деді Қасым-Жомарт Тоқаев.
Мемлекет басшысы биыл Республика күні Қазақстан Тәуелсіздігінің 35 жылдығы қарсаңында аталып өтіп жатқанын атап өтті. Егемендік жылдарында еліміз мемлекеттік рәміздерін бекітіп, ұлттық қаржы жүйесін қалыптастырды, мемлекеттік шекарасын айқындады. Сондай-ақ Сарыарқаның төрінде жаңа елорда – Астана бой көтеріп, Қазақстанның әлемдік аренадағы беделі нығайды. Президент ел жетістіктерінің негізінде халықтың бірлігі мен қоғамдық келісімі тұрғанын атап өтті. Қазақстан бейбітшілік пен тұрақтылықты басты құндылық ретінде ұстанып, халықаралық қауымдастықта өзіндік орны бар мемлекетке айналды.
Салтанатты жиында Мемлекет басшысы Әділетті Қазақстанды құру міндетіне де тоқталды. Оның айтуынша, әділеттілік – қоғам үшін ең жоғары рухани құндылықтардың бірі. Сондықтан тарихи оқиғаларға әділ баға беріп, өткен кезеңнің ел дамуына қосқан үлесін объективті бағалау маңызды. Осы орайда Қасым-Жомарт Тоқаев Тұңғыш Президент Нұрсұлтан Назарбаевтың егемен Қазақстанның қалыптасуына және елдің күрделі экономикалық кезеңдерден өтуіне қосқан үлесін атап өтті.
Президенттің айтуынша, тарихи тұлғалардың еңбегін бағалау – тарихи әділеттіліктің маңызды көрінісі. Республика күні – елдің өткенін бағалап, бүгінгі жетістіктерді саралап, болашаққа ортақ мақсатпен қадам басатын маңызды мереке.
