Қазақстан мен Оңтүстік Корея арасындағы инвестициялық және өнеркәсіптік ынтымақтастықты дамыту бағытында маңызды келісімдерге қол жеткізілді. Мемлекет басшысы Қасым-Жомарт Тоқаевтың Hyundai Motor Group корпорациясының президенті әрі стратегия және жоспарлау жөніндегі бөлім жетекшісі Сунг Киммен кездесуінің қорытындысы бойынша бірқатар перспективті жобаны жүзеге асыру жөнінде уағдаластықтар жасалды.
Кездесу соңында Батыс Қазақстан облысында газ өңдеу зауытын салу туралы QazaqGaz, Hyundai Engineering және SICIM Kazakhstan компаниялары арасында келісімге қол қойылды. Аталған жоба өңірдің өнеркәсіптік әлеуетін арттыруға, газ өңдеу инфрақұрылымын дамытуға және жаңа өндірістік мүмкіндіктер қалыптастыруға бағытталған.
Газ өңдеу саласындағы жобаларды іске асыру Қазақстанның энергетикалық қауіпсіздігін нығайтуға және табиғи ресурстарды тиімді пайдалануға мүмкіндік береді. Сонымен қатар өндірістің жаңа нысандарының пайда болуы өңір экономикасына инвестиция тартуға, жаңа жұмыс орындарын ашуға және ілеспе салалардың дамуына серпін береді.
Бұдан бөлек, Hyundai Motor Company мен Astana Motors компаниялары арасында Hyundai Tucson жаңа моделін Қазақстанда өндіру жөнінде келісімге қол жеткізілді. Бұл қадам еліміздің автомобиль өнеркәсібіндегі өндірістік қуаттарды кеңейтуге және автомобиль өндірісін одан әрі локализациялауға мүмкіндік береді.
Жаңа модель өндірісін іске қосу отандық машина жасау саласының технологиялық әлеуетін арттыруға, автобөлшектер өндірісін дамытуға және қазақстандық кәсіпорындардың өндірістік тізбектерге кеңінен тартылуына жол ашады.
Мемлекет басшысы бұған дейін Қазақстанды автомобиль өндірісі мен экспорты бойынша ірі өңірлік орталыққа айналдыру міндеті қойылғанын атап өткен болатын. Осы мақсатта өндірістің толық циклін қалыптастыру, локализация деңгейін арттыру және экспорттық әлеуетті күшейтуге басымдық беріліп келеді.
Жаңа келісімдер Қазақстан мен Оңтүстік Корея арасындағы экономикалық серіктестіктің мазмұндық тұрғыдан кеңейіп келе жатқанын көрсетеді. Алдағы кезеңде бірлескен инвестициялық жобаларды жүзеге асыру арқылы өнеркәсіп, энергетика және автомобиль жасау салаларындағы өзара тиімді ынтымақтастықты нығайту көзделеді.
