Қазақстанның басты мақсаты – халықтың тұрмыс сапасын арттырып, әр азамат үшін қолайлы әрі қауіпсіз жағдай қалыптастыру. Бұл міндетті жүзеге асыруда қалаларды дамыту, инфрақұрылымды жетілдіру және қоғамдық кеңістіктерді тиімді ұйымдастырудың маңызы зор.
Осы тұрғыдан алғанда, Астана – еліміздің айнасы, Қазақстанның басты қалаларының бірі. Елорда бүгінде жаңашылдық пен жасампаздықты ұстанған азаматтардың басын қосқан заманауи мегаполиске айналып келеді. Қаланың сәулеттік келбеті жаңарып, қоғамдық кеңістіктері абаттандырылып, тұрғындарға қолайлы орта қалыптастыру бағытындағы жұмыстар жалғасуда.
Елордадағы оң өзгерістер қала әкімдігі мен оның құрылымдарының жүйелі жұмысының нәтижесімен байланысты. Бұл ретте Астана қаласының Урбанистика орталығының атқарып отырған қызметі ерекше маңызға ие. Урбанистика орталығының негізгі міндеті – қала тұрғындары үшін жайлы орта қалыптастыруға бағытталған нақты ұсыныстар әзірлеу. Орталық қаланың сәулеттік және қоғамдық кеңістіктерін жетілдіруге арналған жобалар мен тиімді шешімдерді қарастырады. Мұндай тәсіл қаланы заманауи талаптарға сай дамытуға мүмкіндік береді.
Маңызды ерекшеліктің бірі – урбанистикалық шешімдерді әзірлеу барысында тұрғындардың пікіріне мән берілуі. Азаматтардың ұсыныстары, талап-тілектері мен нақты жағдайлары ескерілген жағдайда ғана қала дамуы халықтың күнделікті қажеттіліктерімен үйлесім табады. Тұрғындардың пікірін тыңдау және оны қалалық жоспарлау үдерісіне енгізу – заманауи басқарудың маңызды қағидаттарының бірі. Бұл өз кезегінде азаматтардың қала өміріне деген жауапкершілігін арттырып, қоғам мен мемлекеттік құрылымдар арасындағы өзара байланысты нығайтады.
Астана қаласының урбанистика саласындағы тәжірибесі өзге өңірлер үшін де пайдалы болуы мүмкін. Қала ортасын жоспарлау, қоғамдық кеңістіктерді дамыту және тұрғындардың ұсыныстарын ескеру бағытындағы тиімді тәжірибелерді басқа аймақтарда қолдану қалалардың сапалы дамуына ықпал етеді. Халыққа қолайлы орта қалыптастыру – бір ғана елорданың емес, бүкіл еліміздің ортақ міндеті. Осы бағыттағы жүйелі жұмыс Қазақстан қалаларының заманауи, жайлы және өмір сүруге қолайлы болуына негіз қалайды.
