Қазақстан мен Оман ынтымақтастығын кеңейту мәселелері талқыланды

Астана әуежайында Қазақстан Президенті Қасым-Жомарт Тоқаев пен Оман Сұлтаны Хайсам бен Тариқ Әл Саид екіжақты қарым-қатынастарды дамыту мәселелері жөнінде қысқаша әңгімелесті.

Мемлекет басшысы Оман Сұлтанының Қазақстанға мемлекеттік сапары екі ел арасындағы ынтымақтастықты нығайту тұрғысынан тарихи мәнге ие екенін атап өтті.

Қасым-Жомарт Тоқаев Оман Сұлтандығының экономикалық даму бағытындағы жетістіктеріне және халықаралық аренадағы белсенді рөліне тоқталды. Президенттің айтуынша, Оман өз аймағында ғана емес, одан тыс жерлерде де, соның ішінде Қазақстанда да жоғары беделге ие.

Мемлекет басшысы екі ел арасындағы серіктестіктің әлеуеті зор екенін айтып, ынтымақтастық аясын барынша кеңейту қажеттігін жеткізді. Бұл бағытта саяси диалогты нығайту, экономикалық байланыстарды дамыту және өзара тиімді бастамаларды іске асыру маңызды.

Өз кезегінде Оман Сұлтаны Хайсам бен Тариқ Әл Саид көрсетілген қонақжайлық үшін Қасым-Жомарт Тоқаевқа алғыс білдірді. Сондай-ақ ол алдағы келіссөздердің мазмұнды әрі жемісті өтетініне сенім білдірді.

Мемлекеттік сапар аясында Қазақстан мен Оман арасындағы ынтымақтастықтың негізгі бағыттары бойынша жоғары деңгейдегі келіссөздер өткізу жоспарланған. Сонымен қатар тараптар бірқатар маңызды құжатқа қол қойып, екі ел басшыларының қатысуымен қазақ-оман бизнес форумы өтеді.

Бизнес форум екі мемлекет кәсіпкерлерінің өзара байланысын нығайтуға, инвестициялық мүмкіндіктерді талқылауға және жаңа іскерлік серіктестіктер орнатуға жағдай жасайды.

Оман Сұлтанының мемлекеттік сапары Қазақстан мен Оман арасындағы өзара іс-қимылды жаңа деңгейге көтеруге бағытталған. Алдағы кездесулер мен келіссөздер екіжақты байланыстың басым бағыттарын айқындап, сауда-экономикалық және инвестициялық ынтымақтастықты кеңейтуге мүмкіндік береді.

Добавить комментарий

Ваш адрес email не будет опубликован. Обязательные поля помечены *