Қазақстан Республикасы Президенті Қасым-Жомарт Тоқаев Кения Президенті Уильям Рутоның Қазақстанға сапары аясында өткен жоғары деңгейдегі келіссөздер екіжақты ынтымақтастықты жаңа сапалы кезеңге көтеретінін атап өтті. Мемлекет басшысының айтуынша, тараптар саяси диалогты нығайтуға және экономикалық байланыстарды кеңейтуге өзара мүдделі.

Келіссөздер барысында сауда-экономикалық, инвестициялық, көлік-логистика, ауыл шаруашылығы және цифрландыру салаларындағы әріптестікті дамыту мәселелері талқыланды. Президент Қазақстанның Орталық Азиядағы ірі экономика ретінде өңірлік және жаһандық нарықтармен ықпалдастығын арттырып отырғанын айтты.

Қасым-Жомарт Тоқаев «Қазақстан – Кения» іскерлік кеңесін құру, инвестициялық жобаларды қолдау және көлік-логистикалық инфрақұрылымды дамыту бастамаларын ұсынды. Сондай-ақ Қазақстан тарапынан әуе қатынасын кеңейту және тікелей рейстер ашу мүмкіндігі қарастырылатынын жеткізді.

Мемлекет басшысы ауыл шаруашылығы, тау-кен өнеркәсібі, жасанды интеллект және цифрлық технологиялар салаларындағы ынтымақтастықтың зор әлеуетін атап өтті. Қазақстан Кения нарығына астық экспортын арттыруға, ал өз нарығында кениялық өнімдерді ілгерілетуге мүдделі екенін білдірді.

Президенттің айтуынша, Қазақстан инвестициялық тартымдылығын арттырып, шетелдік бизнес үшін қолайлы институционалдық орта қалыптастырған. Бұл бағыттағы реформалар ұзақмерзімді экономикалық серіктестікке жол ашады.

Кездесу қорытындысында екі ел басшылары Қазақстан мен Кения арасындағы серіктестікті одан әрі нығайтуға және жаңа экономикалық жобаларды бірлесіп жүзеге асыруға дайын екенін растады.

Сонымен қатар тараптар халықаралық ұйымдар аясындағы өзара іс-қимылды жандандыруға келісті. Атап айтқанда, БҰҰ және басқа да көпжақты платформалар шеңберінде бейбітшілік пен тұрақты дамуды ілгерілетуге бағытталған бастамаларды қолдауға дайын екені айтылды. Екі елдің сыртқы саясаттағы ұстанымдарының ұқсастығы өңірлік және жаһандық мәселелер бойынша диалогты тереңдетуге мүмкіндік беретіні атап өтілді.