Қазақстан Республикасының Президенті Қасым-Жомарт Тоқаев Халықаралық балаларды қорғау күніне орай қазақстандықтарды құттықтап, жас ұрпақтың құқықтарын қорғау, денсаулығын сақтау және олардың жан-жақты дамуына қолайлы жағдай жасау мемлекеттің басты басымдықтарының бірі екенін атап өтті.

Мемлекет басшысы өзінің Instagram әлеуметтік желісіндегі парақшасында жариялаған құттықтауында балалардың бақытты өмір сүруіне, сапалы білім алып, толыққанды дамуына жағдай жасау – жалпыұлттық мақсат әрі конституциялық міндет екенін жеткізді. Президенттің айтуынша, әрбір баланың қауіпсіз әрі жарқын болашағын қамтамасыз ету мемлекет саясатының негізгі бағыттарының бірі болып қала береді.

– Халықаралық балаларды қорғау күні құтты болсын! Жас ұрпақтың құқығын қорғау, денсаулығын сақтау және олардың жан-жақты дамуына қолайлы жағдай жасау – жалпыұлттық мақсат және конституциялық міндет. Ауызбіршілігі мықты, тату-тәтті отбасы – бақытты балалық шақтың арқауы. Сондықтан отбасы құндылықтарын қорғау жаңа Конституцияның аса маңызды нормасының бірі ретінде айқындалды, – деп жазды Қасым-Жомарт Тоқаев.

Соңғы жылдары Қазақстанда балалардың құқықтарын қорғауға, олардың әлеуметтік жағдайын жақсартуға және сапалы білім алуына бағытталған кешенді шаралар жүзеге асырылып келеді. Бұл бағыттағы жұмыстар елімізде жүргізіліп жатқан әлеуметтік саясаттың негізгі басымдықтарының бірі саналады. Балалардың қауіпсіздігін қамтамасыз ету, денсаулығын нығайту, шығармашылық және зияткерлік әлеуетін дамыту мәселелері мемлекеттік деңгейде тұрақты бақылауда.

Қасым-Жомарт Тоқаев құттықтауында қазақстандық балалардың түрлі саладағы жетістіктеріне ерекше назар аударды. Мемлекет басшысы жас ұрпақтың білім, ғылым, спорт және өнер салаларында жоғары нәтижелер көрсетіп жүргенін айтып, олардың табыстары елдің жарқын болашағының кепілі екенін жеткізді.

– Өскелең ұрпақтың жасампаздық рухы орасан зор. Олар білім мен спортта, өнерде мол табысқа жетуде, – деді Президент.