Астанада өткен «Әкімшілік әділет және оның құқық үстемдігін қамтамасыз ету ісіндегі рөлі» атты халықаралық форумда Мемлекет басшысы Қасым-Жомарт Тоқаев еліміздегі сот жүйесін жетілдіру, әкімшілік әділет институтын дамыту және азаматтардың құқықтарын қорғау бағытындағы реформалардың нәтижелері туралы жан-жақты баяндады.

Президент өз сөзінде Қазақстанда әкімшілік әділет жүйесінің енгізілуі сот тәжірибесі үшін бетбұрыс кезең болғанын атап өтті. Бұрын азаматтар үшін мемлекеттік органдардың шешімдері мен әрекеттеріне шағымдану және өз құқықтарын қорғау оңай болмаған. Ал әкімшілік әділет жүйесі іске қосылғаннан кейін бұл бағыттағы жағдай түбегейлі өзгерді. Бүгінде күмән туғызатын мәселелердің барлығы әділ қаралып, заң талаптарына сәйкес шешім қабылдауға басымдық берілуде.

Мемлекет басшысының айтуынша, соттардың дәлелдемелерді жан-жақты зерттеуі мемлекеттік органдардың өз шешімдері мен әрекеттерінің заңдылығын дәлелдеуге міндетті екенін көрсетті. Соңғы жылдары әкімшілік істер бойынша шығарылған сот шешімдерінің жартысынан астамы азаматтар мен кәсіпкерлердің мүддесін қорғауға бағытталған. Бұл көрсеткіш әкімшілік әділет жүйесінің тиімділігін дәлелдеп қана қоймай, қоғамдағы соттарға деген сенімнің артуына ықпал етті.

Форум барысында Президент әкімшілік соттардың мемлекеттік аппарат жұмысының сапасын бағалайтын маңызды тетікке айналғанын атап өтті. Әкімшілік әділет институтының рөлі жыл сайын күшейіп келеді. Әрине, сот шешімдеріне көңілі толмайтын азаматтар да кездеседі. Алайда мұндай жағдайларда барлық шағымдар мен пікірлер заң аясында мұқият қаралып, әділ шешім қабылдануы тиіс. Осыған байланысты жаңа Конституцияда әкімшілік сот төрелігінің дербес сот ісін жүргізу нысаны ретінде бекітілуі маңызды қадам болды.

Сонымен қатар мемлекет әкімшілік рәсімдер мен актілердің бірізділігін қамтамасыз ету бағытында жүйелі жұмыстар жүргізуде. Бұл азаматтардың бір мәселе бойынша бірнеше рет сотқа жүгінуінің алдын алып, құқықтық қатынастардың тұрақтылығын қамтамасыз етуге мүмкіндік береді. Сондай-ақ жария-құқықтық сипаттағы дауларды әкімшілік соттардың қарауына беру бойынша ауқымды реформалар жүзеге асырылып жатыр.