Мемлекет басшысы Қасым-Жомарт Тоқаев Астанада өтіп жатқан Жасанды интеллект бойынша III халықаралық олимпиаданың ашылу салтанатына қатысып, білім мен инновацияның жаңа технологиялық дәуірдегі маңызына тоқталды.

Президент өз сөзінде Қазақстанның цифрлық даму бағытында стратегиялық таңдау жасағанын атап өтті. Мемлекет басшысының айтуынша, жасанды интеллект пен заманауи технологияларды дамыту елдің экономикалық әлеуетін арттырып қана қоймай, мемлекеттік басқару жүйесін жетілдіруге және азаматтарға көрсетілетін қызметтердің сапасын жақсартуға мүмкіндік береді.

Қасым-Жомарт Тоқаев Қазақстанның цифрлық даму саласындағы жетістіктеріне назар аударды. Еліміз Біріккен Ұлттар Ұйымының электронды үкіметті дамыту индексінде 193 мемлекеттің арасында 24-орынға ие. Сонымен қатар жаңа технологияларды енгізуге дайындық деңгейі бойынша Қазақстан Орталық Азияда көш бастап келеді.

Мемлекет басшысы елімізде бірыңғай инновациялық экожүйе қалыптастыру жұмыстары жүргізіліп жатқанын айтты. Бұл жүйеде жасанды интеллект мемлекеттік басқару, экономика, бизнес және қоғам өмірінің басқа да маңызды салаларына кеңінен енгізілетін негізгі құралдардың біріне айналмақ.

Президент бұған дейінгі Жолдауында Қазақстанды алдағы үш жыл ішінде толық цифрлық мемлекетке айналдыру жөнінде нақты міндет қойғанын еске салды. Осы стратегиялық мақсатты іске асыру аясында 2026 жыл Қазақстанда Цифрландыру және жасанды интеллект жылы деп жарияланды.

Сондай-ақ Мемлекет басшысы инновацияға негізделген дамудың негізгі бағыттары 1 шілдеде күшіне енген Қазақстанның жаңа Конституциясында айқындалғанын атап өтті.

Жасанды интеллект бойынша халықаралық олимпиаданың Астанада өткізілуі Қазақстанның халықаралық технологиялық және білім беру кеңістігіндегі беделін арттыра түседі. Байқау жас мамандар мен талантты жастардың өз білімін сынауына, тәжірибе алмасуына және жаңа технологиялар саласындағы әлеуетін дамытуына мүмкіндік береді.

Президент қазіргі кезеңді жасанды интеллектіні дамыту жолындағы үлкен өзгерістердің бастауы ретінде бағалап, еліміздің цифрлық трансформация бағытындағы жұмысы алдағы уақытта да жүйелі түрде жалғасатынын атап өтті.