Мемлекет басшысы Қасым-Жомарт Тоқаевтың Корея Республикасына мемлекеттік сапары аясында Қазақстан Президентін Корея Республикасы Президентінің резиденциясында салтанатты түрде қарсы алу рәсімі өтті.
Ресми рәсімге Корея Республикасының Президенті Ли Чжэ Мёң қатысты. Екі мемлекет басшысы өзара жылы ықылас білдіріп, Қазақстан мен Корея арасындағы достық және серіктестік қатынастардың маңызын атап өтті.
Салтанатты қарсы алу рәсімі белгіленген дипломатиялық протокол талаптарына сәйкес ұйымдастырылды. Қасым-Жомарт Тоқаев пен Ли Чжэ Мёң бір-біріне ресми делегация мүшелерін таныстырды. Бұл рәсім екі ел арасындағы жоғары деңгейдегі өзара іс-қимылдың маңызды элементі саналады.
Одан кейін Құрмет қарауылының бастығы Қазақстан Республикасының Президентіне рапорт берді. Екі елдің мемлекеттік әнұрандары орындалып, Қазақстан мен Корея Республикасының мемлекеттік рәміздеріне құрмет көрсетілді.
Мемлекет басшысының Корея Республикасына мемлекеттік сапары Қазақстан мен Корея арасындағы стратегиялық әріптестікті одан әрі дамыту тұрғысынан маңызды мәнге ие. Сапар бағдарламасына екіжақты саяси, сауда-экономикалық, инвестициялық және технологиялық ынтымақтастықты кеңейтуге бағытталған бірқатар кездесулер мен іс-шаралар енгізілген.
Келіссөздер барысында тараптар өзара тиімді серіктестіктің қазіргі жай-күйін талқылап, перспективті бағыттар бойынша пікір алмасуды көздейді. Атап айтқанда, инвестиция тарту, өнеркәсіптік кооперация, автомобиль жасау, жоғары технологиялар, цифрландыру, энергетика және басқа да салалардағы ынтымақтастықты нығайту мәселелеріне назар аударылады.
Қазақстан мен Корея Республикасы арасындағы дипломатиялық қатынастар өзара құрмет пен сенімге негізделген. Мемлекеттік сапар екі ел арасындағы байланыстарды жаңа мазмұнмен толықтырып, ұзақ мерзімді стратегиялық серіктестікті одан әрі тереңдетуге бағытталған.
Салтанатты қарсы алу рәсімінен кейін Қазақстан Президенті Қасым-Жомарт Тоқаев пен Корея Президенті Ли Чжэ Мёң арасында жоғары деңгейдегі келіссөздер өтті. Кездесу барысында екіжақты және халықаралық күн тәртібіндегі өзекті мәселелер талқыланды.
