Ақордада Қазақстан Президенті Қасым-Жомарт Тоқаевтың төрағалығымен Жасанды интеллектіні дамыту жөніндегі кеңестің үшінші отырысы өтті. Жиында өнеркәсіп саласын цифрлық трансформациялау және жасанды интеллектіні өндірісте тиімді қолдану мәселелері талқыланды.
Мемлекет басшысы жасанды интеллект жаңа цифрлық дәуірдегі елдердің бәсекеге қабілеттілігін айқындайтын негізгі факторлардың біріне айналғанын атап өтті.
Президент БҰҰ-ның Өнеркәсіптің дамуы туралы 2026 жылғы есебіне сәйкес, жасанды интеллект әлемдік экономиканы өзгертетін бес трансформациялық мегатрендтің қатарына енгенін жеткізді. Соңғы бес жылда осы технологияға қатысты патенттердің үлесі шамамен үш есе өскен. Бұл жаһандық технологиялық өзгерістердің қарқыны жоғары екенін көрсетеді.
Қасым-Жомарт Тоқаевтың айтуынша, қазіргі кезеңде мемлекеттер арасындағы бәсекелестік табиғи ресурстар мен капиталға ғана емес, өндіріс тиімділігіне де байланысты. Сондықтан Қазақстан еңбек өнімділігін арттыруға, технологиялық жаңғыруды жеделдетуге және қосылған құны жоғары өнім өндіруді кеңейтуге басымдық беруі қажет.
Мемлекет басшысы 2029 жылға дейінгі Digital Kazakhstan стратегиясы аясында нақты экономикалық нәтижелерге бағытталған жасанды интеллектінің ұлттық кешенді экожүйесі қалыптасып жатқанын атап өтті.
Президент келтірген деректерге сәйкес, биылғы сегіз айда өнеркәсіп өндірісінің көлемі 46 триллион теңгеге жуықтаған. Ал өңдеу өнеркәсібі өткен жылдың сәйкес кезеңімен салыстырғанда 8,4 пайызға өскен.
Сонымен қатар Мемлекет басшысы экономикалық өсімнің жоғары қарқынын сақтау үшін өндіріс орындарын жаңғыртып, еңбек өнімділігін арттыру және жоғары қосылған құны бар өнім шығаруды дамыту қажеттігін айтты.
Қасым-Жомарт Тоқаев жасанды интеллектінің басты құндылығы адам әлеуетін күшейтуінде екенін атап өтті. Оның көмегімен инженерлер жұмыс тиімділігін арттырып, басшылар деректерді жедел талдау арқылы негізделген шешімдер қабылдай алады.
Осылайша, жасанды интеллектіні өнеркәсіпке енгізу Қазақстанның өндірістік әлеуетін нығайтып, экономиканың бәсекеге қабілеттілігін арттыруға мүмкіндік береді.