Қазақстан Республикасының Президенті Қасым-Жомарт Тоқаев Қазақстанға мемлекеттік сапармен келген Бельгиялықтар Королі Филипп пен Патшайым Матильданы Астана халықаралық әуежайында қарсы алды. Бұл сапар – Бельгиялықтар Королі мен Патшайымының Қазақстанға алғашқы мемлекеттік сапары.
Мәртебелі меймандар мінген әуе кемесін Қазақстан Республикасының Әскери-әуе күштерінің жойғыш ұшақтары мемлекеттік шекарадан бастап елорда әуежайына дейін қапталдай ұшып барды. Ұшу алаңында корольдік жұпты салтанатты түрде қарсы алу рәсімі ұйымдастырылып, Құрмет қарауылы ротасы мен Президенттік оркестр сап түзеді.
Әуежайдың қабылдау залында Мемлекет басшысы құрметті қонақтармен қысқаша әңгімелесті. Қасым-Жомарт Тоқаев Король Филипп пен Патшайым Матильданың Қазақстанға келуін жоғары бағалап, сапардың екі ел арасындағы байланыстарды одан әрі нығайту үшін маңызды екенін атап өтті. Президент Қазақстан мен Бельгия арасындағы ынтымақтастықты жаңа деңгейге көтеруге мүмкіндік бар екенін айтты.
Өз кезегінде Король Филипп Қазақстан Президентіне жылы қарсы алғаны үшін алғыс білдіріп, алдағы келіссөздердің нәтижелі өтетініне сенім білдірді. Сондай-ақ ол екі ел арасындағы көпқырлы серіктестікті одан әрі тереңдетудің маңызын атап өтті.
Мемлекеттік сапар аясында Қазақстан мен Бельгия арасындағы саяси, сауда-экономикалық және гуманитарлық байланыстарды дамытуға қатысты бірқатар мәселелер талқыланды. Тараптар өзара сауда мен инвестиция көлемін ұлғайтуға, өнеркәсіп, көлік-логистика, энергетика, аса маңызды минералдар, ауыл шаруашылығы және заманауи технологиялар салаларындағы ынтымақтастықты кеңейтуге ниетті екенін растады.
Сонымен қатар білім, ғылым, денсаулық сақтау және мәдени-гуманитарлық бағыттардағы өзара іс-қимылды нығайту мәселелеріне де назар аударылды.
Бельгиялықтар Королі мен Патшайымының мемлекеттік сапары Қазақстан-Бельгия қарым-қатынасының тарихындағы маңызды оқиға ретінде бағаланып, екіжақты әріптестікті одан әрі дамытуға жаңа мүмкіндіктер ашты.