Шымкент қаласындағы А. Пушкин атындағы қалалық әмбебап кітапханада кітап оқу мәдениетін дамыту және оқырмандық сауаттылықты арттыру мәселелеріне арналған дөңгелек үстел өтті. Іс-шара Қазақстан Республикасы Президентінің «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығын іске асыру аясында ұйымдастырылды. Басқосуда 2027–2031 жылдарға арналған «Оқитын ұлт» тұжырымдамасының жобасы талқыланды.
Жиынға білім, ішкі саясат, жастар саясаты, дін істері, мәдениет және спорт салаларына жауапты қалалық басқармалардың өкілдері қатысты. Сондай-ақ Қазақстан Жазушылар одағының Шымкент қаласы бойынша филиалының төрағасы мен мүшелері тұжырымдаманың негізгі бағыттарына қатысты пікірлерін білдірді.
Талқылау барысында кітап оқуды күнделікті өмірдің ажырамас бөлігіне айналдыру, тұрғындардың әдебиетке қызығушылығын арттыру және жастардың оқырмандық дағдыларын қалыптастыру мәселелеріне ерекше назар аударылды. Қатысушылар оқу мәдениетін дамытуда білім беру ұйымдары, кітапханалар, шығармашылық қауымдастықтар мен отбасы арасындағы байланысты нығайтудың маңызын атап өтті.
Кездесуде кітапханалардың қызметін заман талабына сай жетілдіру жолдары да қарастырылды. Олардың ақпарат ұсынатын мекеме ретіндегі қызметімен қатар, білім алуға, шығармашылық ізденіске және рухани дамуға мүмкіндік беретін қоғамдық орталық ретіндегі рөлін күшейту мәселесі көтерілді. Оқырмандарға қолайлы орта қалыптастыру, кітапхана қорларына қолжетімділікті кеңейту және қызмет көрсету сапасын арттыру бағыттары сөз болды.
Сонымен бірге цифрлық технологиялар мен жасанды интеллект мүмкіндіктерін кітап ісінде тиімді пайдалану мәселелері талқыланды. Заманауи құралдарды қолдану арқылы әдеби шығармаларды насихаттау, оқырманмен байланысты жетілдіру және кітапхана қызметтерінің қолжетімділігін арттырудың маңызы айтылды.
Тұжырымдама жобасын талқылау кітап оқу мәдениетін дамытуға қатысты ортақ міндеттерді айқындауға мүмкіндік берді. Көтерілген мәселелер жастарды кітапқа баулу, әдеби мұраны дәріптеу және оқырман сұранысына сай қызметтерді жетілдіру бағыттарын қамтыды. Бұл жұмысқа түрлі сала өкілдерінің қатысуы өзара тәжірибе алмасуға және ұсыныстарды жан-жақты қарастыруға жағдай жасады.
Кітап оқу мәдениетін қалыптастыру – білімді, ізденімпаз және ой-өрісі кең ұрпақ тәрбиелеудің маңызды негізі. Осы бағыттағы жүйелі жұмыс азаматтардың танымын кеңейтіп, сыни ойлау қабілетін дамытуға және ұлттық рухани құндылықтарды нығайтуға ықпал етеді. Басқосуда қарастырылған бастамалар оқуға деген тұрақты қызығушылықты қалыптастыруға, кітапханалардың қоғамдық маңызын арттыруға және зерделі ұлт қалыптастыру міндетін жүзеге асыруға бағытталған.
