Адами капиталдың сапасын арттыру және өскелең ұрпақтың жан-жақты дамуына қолайлы жағдай жасау – мемлекет саясатының маңызды басымдықтарының бірі. Бұл бағытта білім беру жүйесін жетілдірумен қатар, балалардың сапалы білім алып, қабілеті мен әлеуетін толық ашуына мүмкіндік беру ерекше маңызға ие.
Мемлекет басшысы Қасым-Жомарт Тоқаев адами капиталды дамыту мәселесіне айрықша мән беріп келеді. Өйткені елдің болашағы – білімді, бәсекеге қабілетті, ізденімпаз әрі жауапкершілігі жоғары ұрпақтың қолында.
Бүгінде жас буынның сапалы білім алуына, зияткерлік және шығармашылық қабілеттерін дамытуға бағытталған жұмыстардың маңызы артып отыр. Бұл ретте білім беру саласындағы жүйелі өзгерістер мен жас ұрпаққа жасалған жағдай ұзақ мерзімді дамудың берік негізін қалайды.
Адами капиталға салынған инвестиция – елдің ертеңіне салынған инвестиция. Сондықтан өскелең ұрпақтың сапалы білім мен саналы тәрбие алуына жағдай жасау – барша қоғамның ортақ міндеті.
Қазіргі жаһандану және технологиялық даму кезеңінде білім беру жүйесінің басты міндеттерінің бірі – еңбек нарығының сұранысына сай білікті, жаңашыл ойлайтын және заманауи технологияларды еркін меңгерген азаматтарды қалыптастыру. Осы мақсатта білім беру ұйымдарының материалдық-техникалық базасын нығайту, оқыту үдерісіне цифрлық технологияларды енгізу, педагогтердің кәсіби біліктілігін арттыру және оқушылардың ғылыми-зерттеу жұмыстарына қызығушылығын күшейту маңызды. Сонымен қатар ауыл мен қала мектептері арасындағы білім сапасындағы алшақтықты азайту, әрбір баланың әлеуметтік жағдайына қарамастан сапалы білім алуына тең мүмкіндік жасау – қоғамның тұрақты дамуына ықпал ететін негізгі факторлардың бірі.
Жас ұрпақты тәрбиелеуде біліммен қатар ұлттық құндылықтарды дәріптеу, отансүйгіштік рухты қалыптастыру, еңбекқорлық пен жауапкершілік қасиеттерін дамыту ерекше орын алады. Білімді әрі саналы жастар – мемлекеттің интеллектуалдық әлеуетін арттырып, экономиканың түрлі салаларына жаңа серпін беретін қозғаушы күш. Сондықтан отбасы, білім беру ұйымдары және қоғам арасындағы өзара байланысты нығайтып, балалар мен жастардың бастамаларын қолдау қажет.
