Мемлекет басшысы Қасым-Жомарт Тоқаевтың азық-түлік қауіпсіздігін қамтамасыз ету және агроөнеркәсіп кешенін дамыту жөніндегі тапсырмалары аясында елімізде 2026 жылғы көктемгі егіс науқаны толық аяқталды. Дала жұмыстары барлық өңірде агротехникалық талаптарға сай және белгіленген мерзімде жүргізілді.

Егіс науқанының сапалы әрі уақытылы орындалуына Үкімет тарапынан көрсетілген кешенді мемлекеттік қолдау шаралары оң ықпал етті. Ауыл шаруашылығы тауарын өндірушілерін қажетті ресурстармен қамтамасыз ету, егіс алқаптарының құрылымын әртараптандыру, су үнемдеу технологияларын кеңінен енгізу, ауыл шаруашылығы техникасын жаңарту және жеңілдетілген қаржыландыру тетіктерін іске қосу басты назарда болды.

Әсіресе, фермерлерді ерте қаржыландыру бағдарламасы көктемгі жұмыстарды тиімді ұйымдастыруға мүмкіндік берді. Бұл тетік шаруаларға тұқым, жанар-жағармай, минералды тыңайтқыштар мен қажетті техниканы алдын ала сатып алуға жағдай жасап, қаржылық жүктемені азайтты. Нәтижесінде ауыл шаруашылығы өндірушілері егіс жұмыстарын кідіріссіз жүргізіп, өндірістік шығындарды оңтайландыруға қол жеткізді.

Мемлекеттік қолдау аясында ауыл шаруашылығы техникаларын жаңарту жұмыстары да жалғасты. Заманауи техника мен цифрлық технологияларды қолдану еңбек өнімділігін арттырып, жұмыстардың сапалы орындалуына ықпал етті. Сонымен қатар су ресурстарын тиімді пайдалану мақсатында су үнемдеу технологияларын енгізу бағытындағы жұмыстар күшейтілді.

Сала мамандарының пікірінше, қабылданған шаралар ауыл шаруашылығы өндірісінің тұрақтылығын қамтамасыз етіп қана қоймай, еліміздің азық-түлік қауіпсіздігін нығайтуға да елеулі үлес қосады. Бұл бастамалар фермерлердің бәсекеге қабілеттілігін арттырып, ауылдық аумақтардың әлеуметтік-экономикалық дамуына серпін береді.

Бүгінде агроөнеркәсіп кешенін қолдау мемлекеттік саясаттың негізгі бағыттарының бірі болып қала береді. Егіс науқанының табысты аяқталуы – осы салада жүзеге асырылып жатқан жүйелі реформалар мен тиімді мемлекеттік қолдау шараларының нақты нәтижесі. Алдағы уақытта да ауыл шаруашылығы өндірісінің тиімділігін арттыруға және отандық өнім көлемін ұлғайтуға бағытталған жұмыстар жалғасын табады.