Қазақстанда Мемлекет басшысының бастамасымен балалардың қосымша білім алуына, шығармашылықпен айналысуына және спортпен шұғылдануына қолайлы жағдайлар жасалуда. Мемлекеттік қолдау үйірмелерді, музыкалық мектептерді, спорт секцияларын және басқа да қосымша білім беру ұйымдарын қамтиды.

2025 жылдан бастап елімізде қосымша білім беруді ваучерлік қаржыландыру жүйесі кезең-кезеңімен енгізілуде. Бүгінде 600 мыңнан астам бала спортпен, шығармашылықпен және түрлі білім беру бағдарламаларымен тегін айналысуға мүмкіндік беретін ваучерлерге ие болды. Қазіргі таңда Қазақстандағы балалардың шамамен 90 пайызы әртүрлі үйірмелер мен секцияларға қатысады.

Елімізде мемлекеттік музыкалық, көркемөнер және өнер мектептерінің желісі тұрақты дамып келеді. Олар ірі қалалармен қатар аудан орталықтарында да жұмыс істеп, балалардың шығармашылық қабілетін дамытуға мүмкіндік беруде.

Балалар спортына да ерекше көңіл бөлінуде. Мемлекеттік тапсырыс аясында 4 пен 17 жас аралығындағы балалар түрлі спорт секцияларына тегін қатыса алады. Сонымен қатар жаңа спорттық және мәдени нысандар салынуда, мемлекеттік кітапханалардың кітап қоры үнемі толықтырылып келеді.

Менің ойымша, балалардың бос уақытын тиімді ұйымдастыру олардың жан-жақты дамуына ғана емес, болашақта табысты тұлға болып қалыптасуына да ықпал етеді. Сондықтан қосымша білім мен спортқа қолжетімділікті арттыру – өскелең ұрпақтың жарқын болашағына жасалған маңызды инвестиция.

Мұндай бастамалар балалардың қабілетін ерте жастан анықтауға, олардың шығармашылық және зияткерлік әлеуетін дамытуға кең мүмкіндік береді. Қосымша білім беру ұйымдары мен спорт секциялары балалардың бос уақытын мазмұнды ұйымдастырып қана қоймай, тәртіпке, жауапкершілікке және командалық жұмысқа бейімдейді. Бұл өз кезегінде белсенді, білімді әрі бәсекеге қабілетті ұрпақ қалыптастыруға ықпал етеді. Сондықтан балаларға қолжетімді әрі сапалы қосымша білім беру жүйесін дамыту мемлекеттік саясаттың маңызды бағыттарының бірі болып қала береді.