Мемлекет басшысы Қасым-Жомарт Тоқаев Ислам даму банкінің (ИДБ) президенті Мұхаммед Сулейман Әл-Джассермен кездесті. Кездесу барысында Қазақстан мен халықаралық қаржы институты арасындағы стратегиялық әріптестіктің қазіргі жай-күйі мен алдағы даму бағыттары талқыланды.

Президент Ислам даму банкі тәуелсіздік жылдарынан бері Қазақстанның әлеуметтік-экономикалық дамуына елеулі үлес қосып келе жатқан сенімді халықаралық серіктес екенін атап өтті. Мемлекет басшысы қаржы институтының еліміздің ұлттық даму басымдықтарын жүзеге асыруға бағытталған жобаларды тұрақты түрде қолдап отырғанына ризашылығын білдірді.

Кездесу барысында бүгінгі күнге дейін Ислам даму банкі Қазақстанға жалпы көлемі 4,2 миллиард доллардан асатын қаржы бөлгені айтылды. Сонымен қатар қазіргі және болашақ жобалар портфелінің жалпы құны 3 миллиард доллардан асатыны атап өтілді. Бұл көрсеткіштер Қазақстан мен ИДБ арасындағы ынтымақтастықтың қарқынды дамып келе жатқанын және оның стратегиялық маңызға ие екенін айғақтайды.

Қасым-Жомарт Тоқаев су ресурстарын тиімді басқару, көлік инфрақұрылымын дамыту және индустриялық жобаларды жүзеге асыру бағытында көрсетілген қолдау үшін банк басшылығына алғыс айтты. Соңғы жылдары Ислам даму банкі өз тарихындағы ең ірі қаржыландыру пакеттерінің бірін мақұлдап, жалпы құны 1,15 миллиард доллар болатын Су ресурстарын дамыту бағдарламасын, сондай-ақ арнайы экономикалық аймақтар мен индустриялық парктердің инфрақұрылымын дамытуға арналған 1,3 миллиард долларлық негіздемелік келісімді жүзеге асыруға қолдау көрсетті.

Кездесу барысында тараптар 2027–2032 жылдарға арналған жаңа Стратегиялық серіктестік шеңберіндегі ынтымақтастықтың негізгі бағыттарын қарастырды. Президент Қазақстанның Ислам даму банкімен ұзақмерзімді институционалдық серіктестікті одан әрі нығайтуға, инвестициялық ахуалды жақсартуға және бірлескен жобаларды кеңейтуге мүдделі екенін растады.