Megapolisnews.kz Ақпараттық сайт
Шымкент қаласының әкімі Мұрат Әйтенов шаһардағы «Gramad» сауда үйіне ат басын бұрып, осындағы әлеуеметтік маңызды тауарлардың бағасымен танысты. Өйткені бүгінде қала әкімдігімен келісімге келіп, халыққа төмен бағада азық-түлік ұсынып жатқан қаламыздағы жалғыз сауда нүктесі осы «GraМad».
Келісім бойынша бұл бағалар бір жыл бойына сақталады. Әрине маусымдық сұраныстарға қарай баға кішкене құбылуы мүмкін. Мәселен, жазда, күзде көкөніс, бау-бақша өнімдері және басқа да ауыл шаруашылығы тауарларының құны қазіргіден арзан болатыны түсінікті.
— Баға тұрақтылығын бақылау мақсатында «GraMad» көтерме тарату орталығында болып, азық-түліктің бағаларын бақылап шықтым. Мұнда делдал қызметінсіз өндіруші өнімдері тікелей тұтынушыға ұсынылады. Кәсіпкерлер бағаның тұрақтылығын сақтау бойынша қолдау көрсететіндерін айтты. Жергілікті билік тарапынан кәсіпкерлерге тиісті көмек беріледі, — деді қала әкімі.
Мұрат Дүйсенбекұлы азық-түлік бағалары шарықтап кетуден ешқандай қауіп жоқ, себебі қорда халық тұтынатын негізгі әлеуметтік тауарлар жеткілікті екенін айтты. Осыдан бұрын тұрақтандыру қоры арқылы азық-түлікті әкімдік өзі қоймаларда сақтап келсе, енді бұл қызметті толықтай жеке сауда орындарының құзыретіне беріп отыр.
Ендігі жерде халықты арзан азық-түлікпен қамтамасыз етуді жеке компаниялар өз мойындарына алады. Сол үшін мемлекет оларға «Shymkent» ӘКК арқылы тиісті қаражатты бөліп береді.
Өз кезегінде әкім «Gramad» дүкеніндегі әлеуметтік маңызды азық-түлік өнімдерін өндіруші әрі қоймасында сақтап, халыққа саудалап жатқан «Барыс 2007», «Meir-Trade Distribution Company» серіктестіктерінің кәсіпорын, қоймаларында болып, жұмыстарын көріп қайтты.