Megapolisnews.kz Ақпараттық сайт
Елбасы Н.Ә.Назарбаевтың жарлығымен 2016 жылғы 14 қаңтарда Қазақстан халқы Ассамблеясының құрылған күні 1 наурызды елімізде Алғыс айту күні деп жариялаған болатын. Содан бері елімізде бұл күн айтулы мейрам болып атап өтілуде.
Көктемнің алғашқы күнімен тұспа тұс келетін «Алғыс айту» күні мерекесі бүгін Шымкент қаласында дәстүрлі түрде тойлануда. Осы орайда мерекелік шара — қаладағы түрлі этнос өкілдерінің қатысуымен Шымкент қаласы Қазақстан халқы Ассамблеясы ғимаратының алдындағы «Қазақ халқына мың алғыс» монументіне гүл шоқтарын қоюмен бастау алды. Сонымен қатар аталған шара Шымкент қаласы әкімдігінің ғимаратында «Қазақ еліне мың алғыс!» мерекелік концертімен жалғасты.
–Алғыс айту мерекесін осымен бесінші жыл атап өтіп келеміз. «Қазақ халқына мың алғыс!» монументі түрлі этностардың қолдауымен бой көтерген болатын. Тоталитарлық жүйенің өктемдігімен түрлі ұлттардың күштеп жер аударылғаны белгілі. Дала пейілді, дархан көңілді қазақ халқы оларды жатсынбады. Міне, ынтымақ пен бірліктің арқасында қазақ елі 130-дан астам ұлт пен ұлыс өкілдерін бір шаңырақ астына ұйыстырды. Тату-тәтті тұрып жатқан бейбіт елге айналды, — дейді «Ынтымақ» этносаралық мәдени бірлестігінің төрайымы Гауһар Төлепова.
Салтанатты жиын барысында Қазақстанға жер аударылған этностардың өткені мен бүгіні туралы бейнефильм көрсетілді.
Айта кетейік, бүгінде Шымкентте 100-ден астам этнос өкілдері мекен етеді.