Мемлекет басшысы Қасым-Жомарт Тоқаев Шетелдік инвесторлар кеңесінің пленарлық отырысы аясында AD Ports Group басқарушы және бас атқарушы директоры Мұхаммед Әл-Шамисимен кездесті. Кездесу барысында Қазақстан мен AD Ports Group арасындағы ынтымақтастықты кеңейту, көлік-логистика саласын дамыту және Транскаспий халықаралық көлік бағытының әлеуетін арттыру мәселелері талқыланды.

Президент AD Ports Group компаниясының теңіз тасымалы мен порт инфрақұрылымын дамыту саласындағы әлемдік жетекші операторлардың бірі екенін атап өтіп, оның халықаралық логистикалық жобаларды іске асырудағы мол тәжірибесіне жоғары баға берді. Мемлекет басшысы Қазақстан үшін көлік-транзит саласын дамыту және халықаралық дәліздер арқылы жүк тасымалы көлемін ұлғайту стратегиялық басымдықтардың бірі екенін айтты.

Кездесу барысында Орта дәлізді дамыту аясында Каспий өңірінің көлік-транзиттік әлеуетін күшейту мәселесіне ерекше назар аударылды. Қасым-Жомарт Тоқаев жуырда Брюссельге жасаған ресми сапары барысында Еуропалық Одақ басшылығы мен еуропалық бизнес қауымдастығы өкілдерінің Транскаспий халықаралық көлік бағытын Азия мен Еуропаны жалғайтын негізгі дәліздердің бірі ретінде бағалағанын жеткізді. Президенттің айтуынша, еуропалық серіктестер осы бағыт арқылы жүк ағынын едәуір арттыруға мүдделі.

Әңгімелесу барысында жүк тасымалы саласындағы бірлескен кәсіпорындардың қызметін кеңейту, теңіз порттарының инфрақұрылымын жаңғырту, астық және әмбебап жүк терминалдарын салу, сондай-ақ логистикалық қызметтердің тиімділігін арттыру мәселелері жан-жақты қарастырылды. Бұл жобалар Қазақстанның халықаралық көлік дәліздеріндегі рөлін күшейтіп, елдің транзиттік әлеуетін жаңа деңгейге көтеруге мүмкіндік береді.

Өз кезегінде Мұхаммед Әл-Шамиси AD Ports Group компаниясының Қазақстанмен ұзақмерзімді стратегиялық серіктестікті дамытуға және өңірдегі бірлескен жобаларды жүзеге асыруға ерекше қызығушылық танытатынын растады. Оның айтуынша, холдинг көлік-логистика инфрақұрылымын дамытуға бағытталған инвестициялық бастамаларды қолдауға дайын.