Сондай-ақ Президент «Қазақстан Республикасының Құрылтайы және оның депутаттарының мәртебесі туралы» конституциялық заңға қол қойды. Аталған құжат заң шығарушы билікті жүзеге асыратын ең жоғары өкілді орган – Құрылтайдың құқықтық негіздерін белгілейді. Құрылтай партиялық тізім бойынша сайланатын 145 депутаттан құралады және олардың өкілеттік мерзімі бес жылды қамтиды. Заңда Құрылтайдың кең ауқымды өкілеттіктері нақты көрсетілген. Оның ішінде Вице-Президентті, Премьер-Министрді және бірқатар жоғары лауазымды тұлғаларды тағайындауға келісім беру, Президент сайлауын тағайындау, республикалық бюджеттің орындалуы жөніндегі есептерді бекіту сияқты маңызды функциялар бар.

Конституциялық өзгерістердің тағы бір маңызды бағыты – «Қазақстан Халық Кеңесі туралы» заңның қабылдануы. Қазақстан Халық Кеңесі жоғары консультативтік орган ретінде құрылып, азаматтық қоғам мен мемлекеттік билік арасындағы байланысты нығайтуға бағытталған. Кеңес заңнамалық бастама көтеруге және жалпыхалықтық референдум өткізуді ұсынуға құқылы. Оның құрамына этномәдени бірлестіктердің, қоғамдық ұйымдардың, мәслихаттар мен қоғамдық кеңестердің өкілдері кіреді. Бұл құрылым қоғамның түрлі топтарының пікірін ескеруге мүмкіндік береді.
«Әкімшілік-аумақтық құрылыс туралы» конституциялық заң да мемлекеттік басқаруды жетілдіруге бағытталған маңызды құжаттардың бірі болды. Заң әкімшілік-аумақтық бірліктерді құру, тарату, олардың шекараларын белгілеу мен өзгерту, атау беру және қайта атау тәртібін реттейді. Оның негізгі мақсаты – ел аумағын тиімді ұйымдастыру арқылы мемлекеттік басқару сапасын арттыру.